Spreinging í Oslo

Í nátt umleið kl. 1 norska tíð var spreingin uttanfyri eina inngongd til amerikonsku sendistovuna í Oslo.

Stórir skaðar eru ikki av spreingingini. Myndir av staðnum visa knústar rútar, og at lampur eru dotnar niður.

Norska trygdarløgreglan PST arbeiðir við málinum, men sagt verður frá, at trygdarstigið enn ikki er broytt. Løgreglan sigur, at spreingingin var málrættað, men at fyribils er eingin mistonktur. Í løtuni arbeiðir løgreglan við at fáa fatur á videoupptøkum, umframt at annað kanningararbeiði verður gjørt.

Vanliga norska løgreglan, PST, Kripos og amerikanska sendistovan samstarva um kanningararbeiðið.