Skuldsettir fyri harðskap og eldáseting - fýra vikur aftrat í varðhaldinum

Teir báðir menninir, sum eru skuldsettir fyri grovan harðskap, fyri at hava sett eld á við vilja og fyri rán í Havn fyri einum mánaði síðani, hava sjálvbodnir játtað at vera fýra vikur aftrat í varðhaldinum.

Menninir, sum eru 36 og 53 ára gamlir, skulu hava framt hesar gerðir í einum sethúsum í Havn 18. februar.

Maðurin í húsinum var álopin heima hjá sær sjálvum og var fyri ógvusligum harðskapi.

Eisini var eldur settur á, har sum maðurin var staddur.

Boðaði sjálvur løgregluni frá

Maðurin boðaði sjálvur løgregluni frá.  Hann var illa fyri, og var sendur á Landssjúkrahúsið.

Grundlógaravhoyringin 19. februar var fyri afturlatnum hurðum.

Bæði ákæruvaldið og annar verjin bóðu um tað.

Báðir skuldsettu menninir nokta seg sekar.