Illgruni um, at Hamas var uppi í álopi í Reykjavík

Løgreglan hevur illgruna um, at millum teirra, sum eru tiknir fyri eitt grovt álop í einum bilkjallara í Reykjavík í síðstu viku, eru nakrir, sum hava samband við Hamas.

Tí í telefonum teirra eru myndir, har teir fáast við AK-47 maskinbyrsur, skrivar Morgunblaðið.

Og menninir bera eisini eyðmerkini hjá Hamas.

Tað hevur blaðið frá løgreglumonnum, sum vilja vera dulnevndir.

Átta menn tiknir

Átta menn eru tiknir fyri álopið, sum sigst hava samband við brotsmannalið, íslendsk og palestinsk.Tveir teirra eru í varðhaldi.

Ein íslendingur var álvarsliga skaddur í álopinum. Knívar, slagvápn og bilar vóru brúkt.

Álopið verður kannað sum drápsroynd.

Aðrir, sum hava samband við málið, eru úr Svøríki, Palestina og øðrum londum í Miðeystri, skrivar Morgunblaðið.

Yvirgangsmenn

Løgreglan sigur, at nakrir teirra eru á listanum hjá Interpol við monnum, sum eru undir illgruna fyri at vera yvirgangsmenn.

Yvirgangsmenn hava biðið um friðskjól í Íslandi.

Millum annað var ein IS-maður tikin á Akureyri.