Føroyar favorittar ímóti Georgia: - Farligt at snakka um krøv

Føroysku fótbóltskvinnurnar taka ímóti Georgia í HM-undankappingardysti á Tórsvølli seinnapartin leygardagin.

Farna týsdag taptu Føroyar 3-2 fyri Grikkalandi í einum dysti, sum grikkar stýrdu meir ella minni frá byrjan til enda, men ímóti Georgia eru føroyingarnir favorittar á pappírinum. Mótstøðuliðið í dag tapti nevniliga 4-0 fyri grikkum og er niðanfyri Føroyar á styrkilistanum.

 - Men vit spæla fótbólt á vøllinum, so tað kann gera tað sama, minti Durita Hummeland á í práti við fsf.fo.

 - Men vónirnar eru kanska, at vit hava bóltin eitt sindur meir og eru eitt sindur betur við enn ímóti Grikkalandi, segði verjuspælarin.

Durita Hummeland vil kortini ikki so fegin tosa um sigurskrøv í samband við heimadystin seinnapartin.

 - Eg haldi, at tað er altíð eitt sindur farligt at snakka um krøv, tá tú tosar um føroysk landslið, men vit hava víst, at vit kunnu skapa úrslit síðsta árið. Eg haldi ikki, at eg fari at seta tað sum krav, men vónirnar eru góðar, segði Durita Hummeland.

Dysturin byrjar klokkan 17, og Kringvarpið sendir dystin í sjónvarpinum frá klokkan 16.45.