KÍ skrykti sigurin frá vónbrotnum argjamonnum

Obule Sunday Moses sá út til at gerast heilt stóra hetjan inni í Vika, har AB heilt óvæntað var á odda 1-0 ímóti KÍ, sum sá út til at fara at tapa fyri fyrstu ferð hetta kappingarárið. 

Málið hjá AB kom miðskeiðis í fyrra hálvleiki, og hóast klaksvíkingar spældu seg til einstakar møguleikar, høvdu teir ikki megnað at svara aftur ímóti høgt flúgvandi argjamonnunum, tá tíðin var um at fara.

Men meir enn átta minuttir inni í yvirtíðini, bjargaði KÍ sær annað stigið, tá innskifti Deni Pavlovic fekk bóltin í netið og hálaði argjamenn inn aftur í veruleikan.

Javnleikurin kemur eftir lítið sannførandi byrjanina hjá KÍ upp á landskappingina, har meistaraliðið nú hevur mist seks stig upp á seks teir fyrstu dystirnar.

Hinvegin kunnu argjamenn, hóast teir ivaleyst eru vónbrotnir um at missa sigurin á stokkinum, fegnast um góða byrjan upp á árið. AB hevur nú fingið 10 stig burturúr seks teimum fyrstu dystunum í Meistaradeildini og liggja á 4. plássi.

NSÍ vann í evstu løtu

NSÍ stríddist leingi at fáa hol á ímóti EB/Streymi við Løkin í Runavík, har bæði liðini høvdu kjansir. Ikki fyrrenn góðir seks minuttir vóru spældir av yvirtíðini eydnaðist tað innskifta Michal Przybylski at skora sigursmálið fyri oddaliðið.

Runavíkingar, sum høvdu Brand H. Olsen aftur á vøllinum síðsta hálva tíman, eru fremstir í Meistaradeildini við 16 stigum, fýra frammanfyri KÍ og B36.

B36 vann eisini sín dyst 1-0. Ragnar Samuelsen skoraði sigursmálið hjá havnarfelagnum ímóti 07 Vestur, tá eitt gott korter var eftir á Dungasandi. Undir Mýruhjalla endaði málleyst millum Skála og Víking.

Í gjár vann B68 óvæntað 3-1 á HB á Svangaskarði.