Málið um nýtt sjúklingahotell lagt fyri Løgtingið

Uppskot um at byggja nýggjan bygning til Sjúklingahotellið í Keypmannahavn er í dag lagt fyri Løgtingið. 

Síðani 2012 hevur Sjúklingahotellið húsast á Venøgade á Eysturbrúgv í Keypmannahavn, men hesin bygningur rúmar ikki longur øllum sjúklingum og teirra avvarðandi.

Eitt hóskandi grundøki á Rådmandsgade, tætt við Ríkissjúkrahúsið, er funnið. Danski staturin eigur grundøki, og arbeitt verður við eini loysn, har Bygningsstyrelsen byggir ein nýggjan bygning, sum skal húsa Sjúklingahotellinum.

Verkætlanin er í løtuni á einum innleiðandi stigi, har millum annað tørvslýsingin verður nágreinað, og ein byggiskrá verður gjørd.

Áðrenn farið verður víðari, skal Løgtingið taka støðu til, um undirtøka er fyri at halda fram við fyrireikingunum.

Í næsta stigi verða ítøkiligar loysnir og kostnaðarmetingar nágreinaðar - herundir húsaleiga. 

Eyðdis Hartmann Niclasen, landsstýriskvinna í Heilsumálum vónar, at eitt nýtt sjúklingahotel kann verða liðugt um eini trý ár, men tað ber ikki til at siga enn.