Julian setti føroyskt met á heimavegi

Julian Gregersen er framvegis í stórformi.

Tað staðfesti rennarin úr Treysti á heimavegi Klaksvík leygardagin, har FM í hálvmaraton var á skránni. Hann hevði sett sær sum mál at bøta um føroyska metið í hálvmaraton, ið hann átti sjálvur, og tað eydnaðist í frálíkum umstøðum.

Við góðari hjálp frá dananum Janusi Beck Aagaard, sum helt ferðina nakrar umgangir, kom Julian Gregersen á mál við tíðini 1:07:28, sum er 29 sekund skjótari enn gamla metið frá oktober í fjør (Valencia). 

Hetta er í løtuni einasta føroyska metið á vegi hjá bæði kvinnum og monnum, sum er sett í Føroyum. Metið gav sjálvsagt Juliani Gregersen føroyameistaraheitið frammanfyri Oliver Granhøj (1:16:58) og Daniel Hansen (1:18:58).

Bjørk undir oyggjaleikakravið

Bjørk Herup Olsen hevur í vetur kappast av álvara fyri fyrstu ferð í nógv ár. Hon vann vetrarkappingina hjá FÍF, men mál hennara hevur verið at renna undir kravtíðina til oyggjaleikirnar í Føroyum í hálvum maraton.

Júst tað eydnaðist henni til føroyameistaraheitini, sum hon eisini vann frammanfyri Mariu Chun Nielsdóttir og Hallbjørg Danielsen. Oyggjaleikakravið var 1:28:00, og rennarin úr Bragdinum kom á mál við tíðini 1:27:38

121 rennarar kappaðust um føroyameistaraheitini í hálvmaraton hesa ferð. 36 kvinnur og 85 menn. 

786a6526.jpg

Frítekst tagging: 

Ítróttur

Renning

Hálvmaraton

FM í hálvmaraton

Bjørk Herup Olsen