Føroysku menninir taptu aftur fyri Estlandi

Føroysku fótbóltsmenninir vóru næstbest í Baltic Cup-hálvfinaluni ímóti Estlandi, sum vertirnir vunnu við einum máli.

Tað var Tony Varjund, sum skoraði sigursmálið fyri estar, tá 66 minuttir vóru spældir í seinnapartssólini í Pärnu, og ringa gongdin ímóti Estlandi helt sostatt fram.

Estar hava nevniliga vunnið seks av níggju landsdystum ímóti Føroyum, sum hava vunnið tvær ferðir, meðan ein dagur er endaður við javnleiki.

Í fyrra hálvleiki vóru vertirnir omaná, og høvdu einstakar góðar kjansir. Í hinum endanum var Árni Frederiksberg nær við at lumpa málverjarn við einum skoti úr 40 metrum, men bólturin fór omanfyri.

Eftir steðgin skoraði Tony Varjund, tá hann varð stungin afturum føroysku verjuna og lumpaði Gunnar Vatnhamar við eini skotfintu. 

Føroyingarnir royndu at svara aftur, og høvdu eisini nakrar vandamiklar støður; tó uttan at spæla seg til heilt stóru kjansirnar.

Týsdagin verður bronsudysturin á skránni ímóti Lettlandi, sum tapti sína hálvfinalu fyri Litava eftir brotssparkskapping.

Ranna Stadion, Pärnu (Baltic Cup, hálvfinala)

Estland - Føroyar, 1-0 (0-0)

1-0 Tony Varjund, 66 min.