Samrøða: Eingin samanhangur millum brot og avleiðing í Oyndarfjarðarmálinum

Teir fimm býráðslimirnir í Runavíkar kommunu, sum stevndu Fíggjarmálaráðnum við tí fyri eyga at umstoyta avgerðina hjá táverandi Løgmálaráðnum at lýsa umval í allari Runavíkar kommunu, fara víðari við sakarmálinum.

Tað sigur Tóri Højgaard, varaborgarstjóri og ein av teimum fimm, sum á sinni stevndu Fíggjarmálaráðnum, sum yvirtók málið frá Løgmálaráðnum, tá landsstýrið varð broytt í desember í fjør.

Eystari landsrættur fríkendi formannin í valstýrinum í Oyndarfirði, sum var ákærdur fyri valsvik. Men í sama viðfangi sigur landsrætturin í niðurstøðuni, at: "Herefter og sammenholdt med de kriminaltekniske erklæringer finder landsretten det bevist, at det ene kryds på den omhandlede stemmeseddel ikke er afsat af en person, der stemte på Jonhard Danielsen.".

Spurningurin er tí, um tey fimm ikki eiga at góðtaka ta niðurstøðuna, og út frá tí góðtaka, at umval skal vera í Runavíkar kommunu.

Men tað heldur Tóri Højgaard, varaborgarstjóri, ikki.

Í samrøðu vísir hann á fleiri viðurskifti, sum eftir hansara tykki, ikki hanga saman, og eitt av teimum viðurskiftunum er, at tað eftir hansara tykki er ein ov ógvislig avleiðing, UM talan er um valsvik, sum landsrætturin rør framundir, at umval skal vera í allari kommununi.

Her vísir Tóri Højgaard á, at tað kann seta fleiri spurningar enn tað gevur svar, um umval verður, tí eitt umval kann í roynd og veru hava við sær, at alt kommunustýrið verður skift út. 

- Hvussu skulu vit so fyrihalda okkum til tær avgerðir, sum eru tiknar í hesum tíðarskeiðinum, spyr hann.

Millum annað tí heldur hann, at málið skal halda fram í rættarskipanini, eisini um tað hevur við sær, at eitt møguligt umval ikki verður fyrr enn heilt móti endanum av valskeiðinum.

Trýst á pílin

niðanfyri og hoyr alla samrøðuna, sum varð gjørd við Tóra Højgaard, varaborgarstjóra í Runavíkar kommunu, um rættarmálið hjá teimum fimm býráðslimunum.