Klaksvíkar kommuna noyðist at útvega sær 20 milliónir í kassakreditti

Gjaldførið hjá Klaksvíkar kommunu er so mikið vánaligt, at kommunan nú má útvega sær ein rakstrarkreditt.

Umsitingin hjá kommununi mælir til, at kommunan útvegar sær 20 milliónir krónur í rakstrarkreditti, "orsakað av teprum gjaldføri", sum umsitingin orðar seg.

Fíggjarnevndin í Klaksvíkar býráð tekur undir við tilmælinum frá umsitingini, og málið kemur fyri á býráðsfundi í kvøld.

Fleiri eykajáttanir

Umsitingin í Klaksvíkar Kommunu vísir á, at býráðið í næstum skal taka støðu til fleiri eykajáttanir. Verða hesar eykajáttanir samtyktar, so verður neyðugt at útvega meira gjaldføri.

Eisini vísir ein gjøgnumgongd av roknskapinum hjá Klaksvíkar kommunu fyrstu mánaðirnar í ár, at nøkur rakstrarstøð hava ilt við at halda játtanina. 

Skal kommunan útvega sær rakstrarkreditt, krevst politiskur meiriluti fyri tí í býráðnum.