Føroyar og Grønland gjørt nýggjan karmsáttmála um fiskiskap

Føroyar og Grønland hava skrivað undir nýggjan karmsáttmála um fiskiskap.

Sáttmálin er ein dagføring av verandisáttmála, sum varð gjørdur í 1997, og fevnir um tær meginreglur, sum fiskivinnusamstarvið millum londini skal virka eftir, skrivar Uttanríkis- og fiskimálaráðið í tíðindaskrivi.

Sagt verður, at týdningarmestu ásetingarnar fevna um kvotuflytingar, atgongd og eftirlitssamstarv, umframt áhaldandi at fremja vinnuligt samstarv á fiskivinnuøkinum. 

Eisini er ásett, at londini bæði raðfesta vísindaliga grundaða umsiting av fiskastovnum og samstarv um havlívfrøði og havumhvørvi. Øll hesi viðurskifti verða viðgjørd undir teimum árligu samráðingunum  millum londini.

Týdning fyri bæði londini

- Fiskiveiðisamstarvið millum Føroyar og Grønland hevur eina langa søgu og er av stórum týdningi fyri bæði londini, sigur Bárður á Steig Nielsen, landsstýrismaður.

- Ein dagføring av karmsáttmálanum er ein staðfesting av, at londini framvegis ynskja og raðfesta sínámillum samstarvið um fiskivinnu, sigur hann, og vónar, nýggi sáttmálin verður karmur um eitt víðkað samstarv í framtíðini.

Sáttmálin verður lagdur fyri Løgtingið sum uppskot til samtyktar í heyst.