ES ætlar at steingja sosialar miðlar um náttina

ES ætlar, at børn skulu ikki sleppa á sosialar miðlar um náttina. Atgongdin hjá børnum til miðlarnar skal steingjast í minsta lagi átta tímar.

Haraftrat skal ein røð av avmarkingum setast í verk fyri talgilda lívið hjá børnum.

Tað sæst í einum uppskoti til lógaruppskot, sum danska kringvarpið hevur fingið hendur á, og sum roknað verður við, at ES-forkvinnan, Ursula von der Leyen, fer at leggja fram fyrrapartin.

Uppskotið, EU Kids Act, skal vera eitt felags ES-mál at verja børn og ung á talgildum pallum.

Foreldur skulu hava mini-kontu

Í røðu í gjár segði ES-forkvinnan, at børn millum 13 og 15 ár einans skulu hava avmarkaða atgongd til sosialar og talgildar pallar. 

Tað skal gerast við einari sokallaðari mini-kontu, sum foreldrini stovna og hava eftirlit við, og sum skal vera avmarkað.

- Eg veit, at nógv halda valdið hjá tøknirisunum vera ómetaligt. Eg eri ósamd! Segði Ursula von der Leyen í gjár.

Hon segði, at talan skal vera um skraddaraseymaðar verjuskipanir, gjørdar alt eftir, hvussu gomul børnini eru.