Venjarin: nógv eydnaðist væl hjá okkum

Føroyski venjarin, Peter Bredsdorff-Larsen, var bæði nøgdur og ónøgdur eftir tapið fyri Týsklandi í fyrra play-off dystinum í Kiel í dag.

 - Eg sá eitt føroyskt lið, sum bardist manniliga. Eg sá fleiri góðar lutir á føroyska spælinum, men so sá eg eisini alt ov nógvar kjansir, sum vórðu brendir, segði Peter Bredsdorff-Larsen eftir 34-26 tapið.

Venjarin legði dent á, at týskararnir eru sterkir, og at tað vóru støður í dystinum, har munurin á skjótleika og styrki kom ov væl til sjóndar.

 - Hvør einstakur spælari skal hyggja at sínum egna avriki, og gera av, hvat kann gerast betri, segði Peter Bredsdorff-Larsen.

Leygardagin skulu Føroyar spæla seinna play-off dystin í høllini á Hálsi í Havn.