Ein risastór avbjóðing

- Tá ið alt kemur til alt, er hetta eitt EM-endaspæl, og tað verður øgiliga ringt at taka stig frá nøkrum liði.

Tað segði føroyski landsliðsspælarin í hondbólti, Pauli Mittún, sum gleðir seg til at sleppa at royna seg ímóti norsku heimsstjørnuni, Sander Sagosen, stóru pólsku strikuni, Kamil Syprzak, og kviku og fintusterku slovensku spælarunum.

Málið skal kortini vera at vinna dystirnar, og tað ber bert til, um føroyski hópurin trýr upp á møguleikan.

 - Okkara mál skal vera at fara inn til hvønn dyst og veruliga vænta, at vit kunnu vinna, segði Pauli Mittún.

 - Tá ið tú spælir ímóti so góðum leikarum, er tað skjótt, at smátjóðir, sum vit, hava ov stóra virðing fyri teimum, tí teir hava størri og kendari nøvn, enn vit hava. Tað snýr seg um, at vit trúgva upp á, at tað kann lata seg gera, sama um vit møta Norra, Póllandi ella Slovenia.