Teitur við aftur: Hørð kapping um málmansplássið á fótbóltslandsliðnum

Kappingin um málmansplássið á landsliðnum er hørð.

Fyri nøkrum árum síðan skiftust Gunnar Nielsen og Teitur Matras Gestsson um at byrja inni, men HB-málverjin var so nógv skaddur í fjør, at Mattias Lamhauge gjørdist fyrsta val.

Fyrrverandi B36-málverjin loysti uppgávuna til lítar, og harafturat var Bárður á Reynatrøð sannførandi, tá hann fekk kjansin.

Nú er Teitur Matras Gestsson aftur í hópinum, og hann bjóðar hinum báðum av um plássið millum stengurnar.

 - Eg vænti, at minst tveir málmenn fáa spælitíð hesa ferð, segði landsliðsvenjarin, Håkan Ericson.

 - Tað verður ein hørð kapping millum teir báðar, og Bárður hevur eisini staðið seg væl, tá hann er komin inn, sigur landsliðsvenjarin og minnir á avrikið hjá víkingamálverjanum, tá hann mátti avloysa skadda Mattias Lamhauge í málleysa javnleikinum í Albania í fjør.