Aggrasoppar vunnið fínan altjóða tónleikaheiður

Fólk innan tónleikavinnuni, ið sóu Aggrasoppar framføra á The Great Escape, hava valt Aggrasoppar - millum 300 onnur tónleikanøvn - at vera tónlistarliga mest spennandi navnið, ið spældi á The Great Escape í ár. 

Glenn Larsen, stjóri í Faroese Music Export, leggur ikki fingrarnar ímillum. 

"Tað er ein sensatión, at Aggrasoppar, ið er ein føroyskur hipp hopp-bólkur, sum framførir á føroyskum, verður valdur framum mest umtalaðu nýggju ensku bólkarnar."

Júst The Great Escape er ein festivalur, ið hevur virkað sum lopfjøl hjá nøkrum av størstu bretsku nøvnunum yvirhøvur, eitt nú Adele og Ed Sheeran. 

Við heiðurslønini fylgja eisini 5.000 pund, ið eru 50.000 krónur, ið koma væl við hjá Aggrasoppunum. 

"Hetta kann føra nógv meira enn 50.000 krónur við sær, tí hetta kann verða eitt rættiliga avgerandi lop fyri Aggrasoppar," heldur Glenn Larsen. 

*Upptøkurnar í innslagnum av framførsluni hjá Aggrasoppum á The Great Escape gjørdi Jørgen Nordby.