Aðalstjóri hevur brotið lógina og fer frá 

Turid Arge fær eina átalu og fer frá sum aðalstjóri í Heilsumálaráðnum.

Samstundis verður hon ráðgevi í Løgmálaráðnum, boðar Løgmansskrivstovan frá.

Fjalt upplýsingar

Jens Nørtved, kanningarleiðari, sigur í niðurstøðuni í kanningini, at Turid Arge hevur roynt at forða fyri innliti og fjalt upplýsingar fyri almenninginum og umboðsmanninum. Hon hevur tí brotið tænastumannalógina.

Jens Nørtved sigur víðari, at hetta eigur at fáa avleiðingar. Ein ávarðing er ikki nóg mikið, og hann mælir til eina átalu. 

Tað var í desember í fjør, at Turid Arge fór úr Heilsumálaráðnum, meðan málið um hana varð kannað, og Bjørgfríð Ludvig varð sett sum fyribilssettur aðalstjóri í Heilsumálaráðnum.

Tað var Løgingsins umboðsmaður, sum fyrst í desember í fjør gav aðalráðnum í Heilsumálaráðnum eina álvarsliga átalu - fyri ikki at geva Kringvarpinum innlit og fyri at geva manglandi innlit til sjálvan Umboðsmannastovnin, tá hann fór inn í málið.

Umboðsmaðurin segði millum annað, at tríggjar tær fyrstu frágreiðingarnar frá Heilsumálaráðnum til Umboðsmannin vóru so mikið avmarkaðar, at tær kunnu tulkast sum vantandi vilji at upplýsa klagumálið nøktandi yvirfyri umboðsmanninum.


Løgmaður og fyrrverandi løgmaður

Aksel V. Johannesen, løgmaður, og Jóannes Eidesgaard, fyrrverandi løgmaður, tosa um, um tað møguliga eru onnur fjald mál í miðfyrisitingini, sum almenningurin ikki fær innlit í.