Framúr dagur hjá bogaskjúttunum

Tað var ikki bara Anja Eydnudóttir, sum hevði stillað siktið rætt á bogaskjótibreytini mánadagin.

Bogaskjótiliðið hevði ein av sínum heilt góðu oyggjaleikadøgum, og samanlagt komu ikki færri enn fimm gull og ein silvur burturúr langa degnum, har kappast var í sonevndari fullari FITA; 144 pílar úr fýra ymiskum frástøðum.

SÍ EISINI: Átta ár síðan síðst: Anja var ikki til at steðga

Nikkel Petersen vann gull í compound og Hans Petur Højgaard gjørdu honum bragdið eftir í recurve, og Føroyar vunnu eisini báðar liðkappingarnar.

 - Kenslan er øgiliga góð. Eg hevði ikki roknað við, at eg fór at klára tað so væl í dag. Vindurin var øgiligur, og vit hava havt eina harða kapping allan vegin í gjøgnum, men eg legði væl út, og tað gjørdi, at eg vann til endans, segði Nikkel Petersen eftir gullskjótingina. Hann skeyt somikið væl úr 90 metrum, at hann var nær oyggjaleikametinum.

Hans Petur Højgaard var eins tryggur. Hann vann allar fýra frástøðurnar, og fekk triðja einstaklingagullið hjá Føroyum.

 - Tað var heilt fantastiskt. Fimm heiðursmerki í dag. Eg haldi ikki, at mann kann biðja um meir, segði hann um samlaða liðavrikið. Jóannes Poulsen vann silvur í compound. Hann byrjaði heldur illa, men skeyt bara betur og betur og fekk yvirhálað fleiri skjúttar.