Erik Biskupstø: "Vit eru væl nøgd við ársins Summarfestival skrá"

Erik Biskupstø, fyriskipari av Summarfestivalinum, vísur atfinningunum um, at útlendski partur av ársins Summarfestival-skrá er heldur soltin. 

"Vit leggja okkum altíð eftir at fáa nøkur útlendsk nøvn, sum hava nøkur stór altjóða hitt. Tað halda vit hevur eydnast við eitt nú UB40, sum er eitt av teimum heilt stóru ensku nøvnunum frá áttatiárunum," staðfestir Erik Biskupstø. 

Hann vísir eisini á, at Nik & Jay eru kendir millum føroyingar og spæla útseldar arena-konsertir uttanlands. 

"Vit leggja okkum altíð eftir at fáa nøkur útlendsk nøvn, sum hava nøkur stór altjóða hitt.

SÍ EISINI: "SF25: 10 ting tú mást uppliva á Summarfestivalinum"

Nógv forkunnigt føroyskt

Erik Biskupstø heldur eisini, at føroysku nøvnini á skránni eru góð og fjølbroytt, og ein góð blanding av nýggjum og gomlum. 

"Vit hava bæði tað, sum er uppi í tíðini, eitt nú Brimheim, sum ikki hevur spælt í Føroyum í summar, so tað er rættiliga forkunnigt at sleppa at uppliva hana."

Erik Biskupstø nevnir eisini 25 ára hátíðarhaldið hjá Kulum rótum sum eitt spennandi ískoyti til skránna. 

"Kular røtur spælir til dagliga, men sum hevur 25 ára jubileum í ár, og er eitt Klaksvíksfyribrigdi. Har koma upphavsmenninir Ingi Isaksen og Steintór Rasmussen at vera við saman við orginalu sangarunum, Jógvan Hansen, Arnfríð Lützen og Rannvá Lütuse. Tey hava ikki framført saman síðani kanska 2001, so tað verður eisini forkunningt."