Ranja og Sirkill tvísporaðu seg til FM

Ranja H. Djurhuus og hesturin Sirkill livdu upp til vónirnar, tá tey vóru skjótast í Vágum í avgerandi FM-kappingini í tvíspori.

Tey vóru í góðari støði eftir sigurin í Havn fyri tveimum vikum síðan, og tryggjaðu sær eisini føroyameistaraheitið við nýggjum sannførandi sigri leygardagin.

Ranja H. Djurhuus og Sirkill komu fyrst á mál við tíðini 17.92 sekund frammanfyri Barbaru Carlsen á Svannu.

 - Eg giti bara, at tað er tí, at vit hava vant so nógv, segði unga reiðkvinnan.

 - Tað er deiligt, at tey ungu halda seg framat, og hon hevur ein ótrúliga góðan hest, sum hevur verið við í nøkur ár, so tað unni eg henni væl, segði Barbara Carlsen.

Hetta er fyrsta árið hjá 17 ára gomlu Ranju H. Djurhuus í fyrsta flokki, og triðja árið á rað, at ein 17 ára gomul kvinna vinnur FM í tvíspori í fyrstu royndini.

 - Vit byrjaðu við ungdómsmenning í Ríðisambandinum fyri eini fimm, seks árum síðan, og tað vísir seg ordiliga at rigga. Tey ungu trúgva meir upp á tað og vilja bjóða seg fram og vilja ríða. So tað er ordiliga stuttligt, segði Brandur í Dali, formaður í Ríðisambandi Føroya.

Fleiri aðrar FM-kappingar vóru á degnum. Les meir um úrslitini her.