Fyrstu ferð skrivað verk til symfoniorkestur

Í 2022 setti Hans Petur í Brekkunum, stjóri í Føroya Symfoniorkestri, seg í samband við Unn Patursson og spurdi hana, um hon hevði hug at royna nakað, hon ongantíð hevði roynt áður, nemliga at skriva eitt verk fyri symfoniorkestur. Unn játtaði, og hevur hon seinastu trý árini arbeitt við verkinum, sum nevnist "Útgreiningin".

Unn Patursson hevur skrivað tónleik í mong ár, tó mest fyri kór, og tá skrivar hon beinleiðis til tey, sum framføra tónleikin. Tí er tað eitt sindur øðrvísi at skriva eitt verk til symfoniorkestur.

Verkið "Útgreiningin" er í sjey samanhangandi pørtum ella støðum, sum lýsa ávísar kenslur og sálarligar sinnisstøður í einum meldurkendum tíðarskeiði í lívinum. Partarnir eita ‘Farstøð I’, ‘Skip í mjørkanum I’, ‘Tyngd’, ‘Skip í mjørkanum II’, ‘Sirkus!’, ‘Gulir gummistyvlar, skvatla í hyljum’ og ‘Farstøð II’.

Hóast tilgongdin at skrivað verkið hevur verið drúgv, so er Unn glað fyri, at hon hevur prógvað fyri sær sjálvari, at tað ber til at skriva eitt verk til symfoniorkestur.