Sosialurin flytur úr Miðlahúsinum

Sosialurin flutti inn í Miðlahúsið í 2004. Áðrenn húsaðust tey á Argjum. Tey høvdu í eina tíð tosað um at hava eina redaktión í býnum, sum var tættari upp á Løgtingið, landsstýrið og býráðið. 

Ein dag sóu tey, at Valdemar Lutzen høvdu hølini, sum handilin hevði húsast í, til leigu. Tað gekk ikki long tíð, og so hevði Sosialurin ein leigusáttmála. Tey seldu húsini á Argjum og brúktu 1,5 mió at seta húsini í býnum í stand. Í apríl 2005 flutti redaktiónin endiliga inn. Tað gjørdu tey ein fríggjadag seinnapart.

"Vit tóku teldurnar og tað, sum lá á borðinum, aftan á blaðið var sent til prentingar fríggjadag. So fóru vit oman í húsini í býnum og settu stikkararnar í, og so arbeiddu vit víðari sum vanligt," sigur Eirikur Lindenskov, blaðstjóri á Sosialinum. "Tað var stórt, og tað var akkurát, tá stórheitstíðin hjá bløðunum var."

Tá var húsið fult av fólki, og tá tey høvdu redaktiónsfund, og øll vóru til staðar, var næstan ikki pláss fyri øllum. Men í dag er mikið tómligari. Nógv er broytt, síðani Sosialurin flutti inn í 2004. 

Nógv er broytt

"Tá komu Sosialurin og Dimmalætting út fimm ferðir um vikuna, so tað vóru 10 bløð um vikuna. Í dag kemur Sosialurin út eina ferð um vikuna og Dimalætting eina ferð um mánaðin."

Netið hevur havt sína ávirkan.

Høvuðsinntøkan hjá bløðunum vóru lýsingarnar, leysasølan og haldarar. Í dag eru lýsingarnar farnar á netið, sum hevur minkað nógv um inntøkurnar. Tíðindaflutningurin er eisini fluttur yvir á netið, so bløðini eru ikki líka aktuell longur. 

"Fyrr vóru bløðini prentað í prentsmiðju í Havn, men í dag verður Sosialurin prentaður í Danmark. Tá tekur tað tveir dagar, til tey eru í postkassunum og handlunum. Tað hevði slett ikki borið til fyrr, tí tá hevði tað verið gomul tíðindi. Í dag eru bløðini meira portrettir og minni dagsaktuell tíðindi," sigur Eirikur Lindenskov.