Claus: - Vit mugu variera okkara álopsspæl

- Innstillingurin var rættur, men viðhvørt mást tú viðurkenna, at tú ert upp ímóti einum betri liði, og tað vóru vit í gjár móti Týsklandi, sigur Claus Mogensen, føroyskur landsliðsvenjari.

Hann roknar tó ikki við, at Serbia fer at verja eins og Týskland, tí serbisku kvinnurnar koma at standa meira flatt í verjuni og brúka sín fysikk, heldur Claus Mogensen.

- Eg eri sannførdur um, at Serbia vil hava ein skitnan dyst í morgin, og tí tað verður eitt øðrvísi mentalt trýst móti okkum, sum fleiri av okkara spælarum ikki hava roynt áður, roknar føroyski landsliðsvenjarin við.

Claus Mogensen og venjararnir hava lagt til merkis, at liðini fyrireika seg væl móti føroyska liðnum, og tí er neyðugt at variera álopsspæli.

- Vit rokna við, at vit fara at variera ímillum sjey móti seks og seks móti seks, sigur hann.