Nýggj royndarskipan skal verja børn á veg í skúla

Í morgun fingu børn í Fuglafirði eina hjálpandi hond, tá tey fóru í skúla, tí Fuglafjarðar kommuna hevur avgjørt at børnini skulu fáa ferðsluhjálp. 

Skipanin er m.a. sett í verk,  tí foreldur í Fuglafirði hava rópt varskó um vandamiklu ferðsluna um morgunin. Ein teirra, er Sarita Jacobsen, sum eigur tvey børn, ið hvønn dag skulu ganga millum tungu ferðsluna. 

- Onkuntíð er trupult at sleppa yvirum vegin, tí har er so nógv ferðsla, sigur sonur hennara, 12 ára gamli Jónatan Emilian Danielsen. 

Nú hevur kommunan avgjørt at sett eina royndarskipan í verk, sum skal gera tað tryggari hjá børnunum at sleppa í skúla um morgunin - og byrjað var í dag. 

Skipanin við ferðsluhjálparunum verður royndarkoyrd í tríggjar vikur og síðani eftirmett, sigur Dávur Juul, borgarstjóri í Fuglafjarða kommunu. 

Lovisa Petersen Glerfoss, stjóri í Ráðnum fyri ferðslutrygd, var gestur í sjónvarpsstovuni.