Filmur um føroyskan felagssang

Sangur er ein partur av føroysku mentanini, sum vit ikki skulu taka fyri givið. Tað sigur Gudmund Helmsdal, sum í hesum døgum ger ein heimildarfilm um tann føroyska felagssangin, eitt nú um midnáttarsangin á ólavsøku. 

- Eg ætli mær næstan at komponera kensluna av føroyska felagssanginum, sigur leikstjórin, ið lýsir verkætlanina sum ein kreativan heimildarfilm um okkara sangmentan. 

Ólavsøkan í ár

Ert tú ein av teimum, sum var til midnáttarsangin á ólavsøku fyri tveimum døgum síðani, so finnur tú kanska teg sjálva ella sjálvan í upptøkunum, sum longu eru gjørdar. Vart tú ikki við í ár, so hevur tú framvegis stundir at vera við, tí fleiri upptøkur skulu gerast næsta ár, fortelur leikstjórin. 

Og ert tú ein av teimum, sum fann telefonina fram á ólavsøku, so vil Gudmund Helmsdal fegin hoyra frá tær. "Eg vil gjarna hava tað fólksliga við eisini," leggur hann dent á.