Labour tekur seg inn á konservativa flokkin

650 sessir eru í parlamentinum, og fyri at fáa meiriluta, krevjast 326 sessir. Veljarakanningar, sum eru gjørdar undir valstríðnum, hava víst, at konservativi stjórnarflokkurin hjá Boris Johnson, forsætisráðharra, fær greiðan meiriluta í parlamentinum.

Men ein nýggj kanning vísir, at størsti andstøðuflokkurin, Labour, hevur tikið seg inn á konservativa flokkin. Kanningin vísir, at konservativi flokkurin fær 43 prosent og Labour 34 prosent.

Brexit-ætlanin hjá Johnson kann vera í vanda

Politiskir eygleiðarar siga, at fær Boris Johnson ikki meiriluta í nýggja parlamentinum, kemur ætlan hansara um Brexit í vanda.

Hann noyðist at samstarva við aðrar flokkar, og tað verður ikki, sum at siga tað, tí hann hevur lagt sjógv millum seg og Liberalu demokratarnar og norðurírska flokkin, DUP.

DUP hevur verið stuðulsflokkur hjá bretsku stjórnini síðani 2017, men flokkurin tekur ikki undir við Brexit-avtaluni, sum Boris Johnson gjørdi við ES í oktober.

Skulu kanska atkvøða um ES-limaskapin aftur

Hinvegin er DUP ein borgarligur flokkur, sum ikki vil samstarva við Labour. Eydnast tað ikki Boris Johnson at fáa meiriluta í parlamentinum eftir valið, fær Labour-leiðarin, Jeremy Corbyn, litið upp í hendur at skipa stjórn.

Tað kann hava við sær, at bretar aftur skulu á fólkaatkvøðu um limaskapin í ES, siga politiskir eygleiðarar. Labour kann gera eina roynd at fáa stuðul frá skotska tjóðskaparflokkinum, SNP, og Liberalu demokratunum. 

Undir valstríðnum hevur Labour lovað SNP eina nýggja fólkaatkøvðu um loysing frá Bretlandi, og Liberalu demokratarnir krevja eisini nýggja fólkaatkvøðu um ES-limaskapin. Úrslitið av parlamentsvalinum í Bretlandi í dag verður væntandi greitt í nátt.