Christian í Grótinum settur á sølulista

Uppsjóvarskipið Christian í Grótinum er sett á sølulista. 

Jan Petersen, stjóri í partafelagnum Christiani í Grótinum, sigur við Portalin, at reiðaríið umhugsar møguleikan at byggja nýtt skip fyri verandi Christian í Grótinum, sum er bygdur í 2003.

Í fyrstu atløgu vil reiðaríið tó bara kanna, um áhugi er at keypa skipið, og fyri hvønn prís.

Verandi Christian í Grótinum, sum sambært Teyggjuni fyrstu ferð varð skrásettur í Føroyum í 2013, hevur kølitangar, men ikki verksmiðju. Norðborg hevur verksmiðju.

Við Portalin sigur reiðaríið, at enn er støða ikki tikin til, um ein møguligur nýbygningur verður kølitangaskip ella verksmiðjuskip. 

Sambært Portalinum er áhugi fyri at keypa Christian í Grótinum, bæði úr Grønlandi og Russlandi.