1.800 búsetingar aftrat

Ísrael hevur góðkent 1800 búsetingar á hersetta vestara áarbakka, fáar dagar fyri tjóðartingsvalið, sum verður mánadagin.

Tað upplýsir verjumálaráðharrin, Naftali Bennet. Hann sigur, at ein nevnd hevur góðkent, at 1800 íbúðareindir kunnu byggjast aftrat.

ES fordømdi í januar ísraelsku ætlanina um at víðka búsetingarnar á vestara áarbakka og heitti á ísraelsku stjórnina um at gevast við allari bygging, sum stríðir ímóti fólkarættinum, sigur ES.

Tvífalda búsetingarnar

Naftali Bennet, verjumálaráðharri, vísir aftur, at búsetingarnar eru ólógligar. Hann sigur, at málið er at tvífalda búsetingarnar í hersettu økjunum úr 400.000 upp í 800.000.

Mánadagin verður triðja valið til Knesset hetta seinasta árið. Tað eydnaðist ikki at skipa nýggja stjórn eftir valið í apríl og september.

Í valstríðnum hevur Benjamin Netanyahu, forsætisráðharri, tikið ætlanir um búsetingar framaftur, sum hava ligið í skuffuni síðani 2012.

Tá vórðu USA og Evropa harðliga ímóti ætlanini. Síðani Donald Trump tók við sum forseti, hevur USA ikki funnist so nógv at ísraelsku búsetingunum.