Einki ansingargjald í Fuglafirði og á Strondum

Fulgfjarðar kommuna og Sjóvar kommuna boða nú frá, at kommunurnar ikki fara at krevja ansingargjald frá bogarum, meðan dagstovnarnir hava stongt vegna Korona. 

Sostatt leggjast tær aftrat teimum kommunum, ið hava valt hendan leistin.

Tað eru nakrar vikur síðan, at fyrstu kommunurnar boðaðu frá, at borgarar sluppu undan hesum gjaldinum. 

Men summar kommunur, harímillum Sjóvar kommuna, ynsktu at Kommunufelagið kom við eini felags støðu um gjaldið. 

Men nú tað er greitt, at eingin slík útmelding kemur, hevur kommunan samtykt, at einki gjald verður kravt fyri barnaansing so leingi serligu tiltøkini í samband við Covid-19 standa við.

Samtyktin er galdandi til 13. apríl. Um nýggj boð koma um tiltøk í samband við Covid-19, verður málið tikið uppaftur.