Væntandi klárt um mánaðarskiftið august-september

Norðborg verður væntandi klár at fara til fiskiskap aftur um mánaðarskiftið august-september. Reiðaríið í Klaksvík hevur funnið blokk og krumtapsaksil hjá einum upphøggjara í USA.

Hann keypti ein motor, sum fór til Suður-Korea í 2009, men er ongantíð brúktur. Lutirnir, sum viga 25 tons, skulu koyrast úr New York til Halifax, haðani eitt skip hjá Eimskipi fer eftir teimum mikudagin. 

Teir eru so í Klaksvík tann 23. juli. Síðani ganga fýra-fimm vikur at seta teir í Norðborg. Blokkurin hjá Norðborg brotnaði 20. juni, tá skipið var til fiskiskap. Við øllum kostar skaðin yvir tíggju milliónir krónur.