Robottarmur skal venja armar og hendur

Klaksvíkar Sjúkrahús hevur fingið robottarm, sum fer at styrkja endurvenjing av ørmum og hondum. Tað boðar Klaksvíkar sjúkrahús frá í tíðindaskrivi.

Robottaarmurin er partur av ætlan hjá Heilsumálaráðnum at styrkja endurmenningina á sjúkrahúsunum.

Hann er serliga ætlaður fólkum, sum hava fingið eitt nú blóðtøpp ella bløðing í heilan. Hesi fólk uppliva ofta, at tey verða meira ella minni lammað í arminum.

Fegin um nýggja tólið

Ein týðandi partur av endurvenjing er at gera nógvar og regluligar endurtøkur av venjingum, og tað kann robotarmurin hjálpa við.

Robottarmurin er gjørdur soleiðis, at hann kann venja bæði grov-motorikk og fín-motorikk í ørmum og hondum.

- Vit eru sera fegin um nýggja tólið, sum fer at styrkja endurvenjingina á Klaksvíkar sjúkrahúsi, sigur Súsanna Olsen, varastjóri á Klaksvíkar sjúkrahúsi, í tíðindaskrivinum.