Eiga ikki at lóggeva á felagsøki

Tað eigur ikki at koma fyri í einum rættarsamfelagi, at vit lóggeva á felagsøki, tá tað er greitt, at føroyskir myndugleikar ikki hava lóggávuvaldið á økinum. 

Tað sigur Lógartænastan á Løgmansskrivstovuni um at brúka matstovulógina til at avmarka upp- og afturlatingartíðir hjá skeinkingarstøðum fyri at forða fyri smittuspjaðing.

Forðingar fyri smittuspjaðing eru í epidemilógini. Og hon er donsk. 

Tingfólk ørkymlað

Sundheds- og Ældreministeriet í Danmark er samt við tulkingina hjá Lógartænastuni. Og tað var umsitingin hjá løgtinginum eisini. Hon mælti tó ikki til at burturvísa málinum.

Í álitinum frá Vinnunevndin sæst greitt, at eisini tingfólk vóru sera ørkymlað, tí tað var ivasamt, um løgtingið hevði neyðuga lóggávuvaldið, sigur Lógartænastan í ársfrágreiðing sínari fyri løgtingsárið 2019, sum endaði á ólavsøku í fjør. 

Eftirkannaði 202 mál

Lógartænastan á Løgmansskrivstovuni eftirkannaði 202 uppskot frá landsfyrisitingini í løgtingsárinum 2019. Tað eru 64 uppskot færri enn í løgtingsárinum 2018, men á leið tað sama sum í 2015. 

Felags fyri 2015 og 2018 er, at nýtt landsstýri tók við hesi árini. Eitt nývalt landsstýri ger vanliga ikki so nógv lógaruppskot fyrstu tíðina, sigur Lógartænastan.