Helmingurin koppsett í Stóra Bretlandi

Helvtin av teimum vaksnu fólkunum í Stóra Bretlandi hava nú fingið minst ta einu koppsetingina fyri COVID-19.

Tað segði ráðharrin í heilsumálum, Matt Hancock, í gjár sambært tíðindastovuni, Reuters.

Sostatt er landið tað fyrsta stórveldið, har helmingurin av teimum vaksnu fólkunum hava fingið minst eitt prik.

Hetta merkir, at Stóra Bretland so smátt kann fara at slaka uppá smittutálmandi átøkini, sum eru í landinum.

– Koppsetingarætlanin er okkara vegur úr farsóttini, sigur Matt Hancock við sjónvarpsstøðina, Sky News.

Forsætisráðharrin í Bretlandi, 56 ára gamli Boris Johnson, fekk sjálvur tað fyrra prikið fríggjadagin við koppsetingini hjá AstraZeneca.

Júst tann koppsetingin hevur verið nógv umrødd seinastu vikurnar, tí illgruni hevur verið um, at koppsetingin kann elva til blóðtøppar.

Tað eru nú koppsett 26,9 milliónir vaksin fólk í Stóra Bretlandi, sambært almennu tølunum. Tað búgva tilsamans 52,7 milliónir vaksin fólk í Stóra Bretlandi.