Uppskot um útlendingar og fastogn til hoyringar

Landsstýrið hevur nú gjørt eitt lógaruppskot um fastognir og útlendingar.

Uppskotið er sent til hoyringar, og hoyringarfreistin er til 23.apríl.

Løgmansskrivstovan hevur gjørt uppskotið um at keypa fastogn í Føroyum.

Endamálið er, sigur Løgmansskrivstovan, at tryggja, at tann, sum eigur fastogn í Føroyum, hevur tilknýti til Føroyar.

Ikki óneyðugar forðingar

Eitt annað endamál er at forða fyri, at ov nógvir útlendingar eiga fastogn í avísum økjum í Føroyum. Men uppskotið skal tó ikki seta útlendskari vinnu óneyðugar forðingar.

Í løtuni eru ongar føroyskar reglur um, hvør kann keypa fastogn í Føroyum. 

Fastogn er hús, íbúðir, grundstykki, jørð og annað.

Tjóðveldi hevur eisini eitt uppskot um fastogn og útlendingar. Tað uppskotið er í Rættarnevndini.