- Tíðindi, mentan og ítróttur
Føroyar fáa skjótt eitt fólkaheilsustýri
Stýrið skal við hollum kunnleika til føroysk viðurskifti loysa fleiri heilsufakligar uppgávur í føroyska samfelagnum.
– Tørvur er á einum stovni, sum kann verða millumliðið ímillum Heilsumálaráðið og heilsuverkið, sigur landsstýrismaðurin í heilsumálum, Kaj Leo Holm Johannesen.
Fólkaheilsustýrið skal veita heilsufakliga ráðgeving, gera fólkaheilsuarbeiði, lýsa og greina heilsustøðuna hjá føroyingum og veita almenna kunning um heilsuviðurskifti.
Skipast í stigum
Nógvar uppgávur liggja longu og bíða eftir Fólkaheilsustýrinum, ið skal setast og fáast at virka, sigur landsstýrismaðurin í heilsumálum.
Fólkaheilsustýrið verður skipað í stigum, og fer eftir ætlan at virka frá 1. januar 2022. Enn er tó ikki greitt, hvørji fólk fara at sita í stýrinum.
Talan verður ikki um at skipa nýggjan stovn. Í staðin skulu uppgávur frá ymsum stovnum leggjast í Fólkaheilsustýrið, sigur landsstýrismaðurin.