Taka undir við andstøðuuppskoti um sorgarfarloyvi

Tað óvanliga er hent í løgtinginum, at samgongan tekur undir við einum uppskoti hjá einum andstøðutingmanni.

Øll í Vinnunevndini taka undir við uppskotinum til samtyktar hjá Djóna Nolsøe Joensen í Javnaðarflokkinum um at geva foreldrum sorgarfarloyvi, sum missa eitt barn, áðrenn tað er myndugt.

Nevndin heldur tó ikki, at sorgarfarloyvi skal vera í Barsilsskipanini, sum skotið verður upp í uppskotinum. 

Vinnunevndin hevur eitt broytingaruppskot, sum biður landsstýrið koma við einari skipan um sorgarfarloyvi til foreldur, sum missa barn, og tryggja teimum dagpengar, meðan tey eru í farloyvi.

Uppskot um barnaváttan fall

Verri gekst við einum øðrum uppskoti hjá Djóna Nolsøe Joensen. Uppskotið um barnaváttanir fall í tinginum í gjár.

Grundgevingin var tann vanliga hjá samgonguni. Hon er, at landsstýrið arbeiðir við málinum, og eitt uppskot um barnaváttanir kemur haðani eftir ólavsøku.

Ein barnaváttan er ein víðkað revsiváttan, har upplýst verður, um fólk, sum arbeiða við børnum undir 15 ár, eru dømd fyri at hava gjørt seg kynsliga inn á børn.