Nú kemur lóg um viðgerð fyri barnloysi

Í næstu tingsetu fer landsstýrismaðurin í heilsumálum at leggja fram lógaruppskot um viðgerð fyri barnloysi.

Tað sigur Kaj Leo Holm Johannesen, landsstýrismaður, í svari til Ingilín Didriksen Strøm, løgtingskvinnu.

Hon spurdi, hví rundskrivið frá 2004 um stevnumið viðvíkjandi viðgerð fyri barnloysi er sett úr gildi.

Landsstýrismaðurin svarar, at rundskrivið varð sett úr gildi í 2006.

Ásetast við lóg

Orsøkin var, at løgfrøðiliga var ikki mett at vera rætt at nýta eitt umfarsskriv sum grundarlag fyri avgerðum um, hvør hevði rætt til viðgerð fyri barnloysi.

Hetta skuldi í staðin ásetast við lóg. Og uppskot um ta lógina kemur í næstu tingsetu.

Men Sjúkrahúsverkið hevur kortini fíggjað upp til tvey felags børn fyri barnleys pør, verður upplýst í svarinum.