Eriksen small um og fekk fyrstuhjálp

EM-dysturin millum Danmark og Finnland er fyribils steðgaður, tí miðvallarin, Christian Eriksen, brádliga small um og varð borin av vøllinum eftir at hava fingið fyrstuhjálp.

Dansk Boldspil Union skrivaði fyri løtu síðan, at Christian Eriksen er við vit, og at støðan er stabil. Hann er innlagdur á Ríkissjúkrahúsinum og verður nú kannaður nærri, boðar DBU frá.

40 minuttir vóru spældir av fyrra hálvleiki, tá Christian Eriksen brádliga small um. Samarittar og danska læknatoymið komu á vøllin og góvu miðvallaranum viðgerð á vøllinum, meðan liðfelagarnir stillaðu seg í ring rundan um hann. 

Umleið eitt korter seinni varð hann borin av vøllinum og koyrdur á sjúkrahús.

Júst nú er avgjørt, at dysturin verður spældur liðugur í kvøld. Hann byrjar aftur klokkan 19.30.