Biden: Tíðin var komin at enda kríggið

Amerikanski forsetin, Joe Biden, helt í gjárkvøldið røðu fyri amerikanska fólkinum um afturtøkuna úr Afganistan. 

Hann vardi av øllum alvi avgerð sína um at kalla amerikonsku herdeildirnar heim úr Afganistan.

- Tíðin var komin at enda hetta kríggið, segði Biden meira enn eina ferð í røðu síni.

Hann rósti eisini tilgondini í sambandi við afturtøkuna, amerikonsku hermonnunum og øðrum, sum vóru við í afturtøkuni.

Biden lýsti afturtøkuna sum eitt sera væleydnað framstig, og segði, at fleiri enn 120.000 fólk eru flogin heim úr Afganistan eftir fáum vikum.

Slepst ikki undan trupulleikum

- Eingin afturtøka, tá eitt kríggj skal enda, kann gerst uttan trupulleikar,  segði hann. Ein útsøgn, sum hildið verður er ætlað teimum, sum hava funnist at stundum óskipaða og ógvusliga átakinum.

Biden vísti aftur, at aðrar loysnir høvdu verið, enn at enda kríggið innan fyri tíðarætlanina, sum USA sjálvt hevur ásett.

Biden fanst eisini at avtaluni hjá fyrrverandi forsetanum, Donald Trump, við Taleban, har Trump lovar, at USA skal fara úr Afganistan fyri 1. mai í ár,  ein tíðarætlan, sum Biden longdi til 31. august.

Partur av avtaluni er, at túsundtals talibanskir fangar skulu latast leysir, aftur fyri at talibanar ikki leypa á amerikanska herdeildir.

Bundin á hond og fót

Biden segði seg verða bundnan á hond og fót av hesi avtaluni.

- Veruliga valið var antin at halda avtaluna, ella at herða kríggið. Og eg vildi ikki leingja kríggið, segði Biden.

Sambært Biden var valmøguleikin at hava eina lítla herdeild í Afganistan verri.

- Eg haldi ikki, at trygdin hjá USA verður styrkt við framvegis at brúka milliardir av dollarum og framvegis hava túsundtals hermenn í Afganistan, segði forsetin.

Tey flestu farin úr Afganistan

90 prosent av amerikanarunum, sum vilja sleppa úr Afganistan, eru nú flutt úr landinum. 

Nú skulu sendifólk undir leiðslu av Antony Blinken, uttanríkisráðharra, og sameindum, gera sítt fyri at fáa teir 100 - 200 amerikanararnar heim, sum framvegis eru í Afganistan.