Loysir seg ikki at siga lánið í tunlunum upp

Eysturoyartunnilin og Sandoyartunnilin hava helst nakað lægri kredittvirði nú, enn síðst í 2016, tá avtalan um fígging var gjørd. 

Tí inntøkurnar eru minni, enn tá var mett.

Partafelagið Eystur- og Sandoyartunlar ætlar ikki at umfíggja lán felagsins nú. Tað er ikki nakar fyrimunur, heldur felagið.

Dýrt at siga lánið upp

Tað sigur Jørgen Niclasen, landsstýrismaður, í svari til Frimodt Rasmussen, løgtingsmann, sum spurdi um umfígging.

Sambært tunlafelagnum hevði tað kostað nógv at sagt upp verandi skuld og lagt hana um. 

Í øðrum lagi er ivasamt, um felagið hevði fingið lagaligari fígging.

Í triðja lagi er verkætlanin ikki liðug, og tí er byggiváði framvegis tengdur at verkætlanini.

2,680 mia. kr.

Eystur- og Sandoyartunlar hava tikið eitt lánsbrævalán, sum er tvær milliardir og 680 mió. kr. við fastari rentu, sum er 2,73 prosent.

Felagið byrjar at rinda avdráttir í 2023. Síðsti avdrátturin fellur sambært lánsavtaluni til gjaldingar í 2040.

Landskassin læt trygd fyri einari minstu inntøku hjá Eystur- og Sandoyartunlum.

Hetta varð gjørt fyri at fáa fígging til verkætlanina við rímiligum og lagaligum treytum. 

Frimodt Rasmussen