Fuglafjørður: Fíggjarætlanin javnvigar við 142 mió. kr.

Fíggjarætlanin fyri 2022 í Fuglafjarðar kommunu javnvigar við 142,3 mió. kr.

Tað samtyktið býráðið í gjárkvøldið.

Skatta- og avgjaldsinntøkurnar verða mettar til 98,2 milliónir kr., rakstrarinntøkurnar verða mettar til 40,4 mió. kr., og innistandandi peningur er 3,7 mió. kr. 

Miðalvøksturin í rakstrinum er umleið 5,6 prosent samanborið við fíggjarætlanina í fjør.

Fyrireika íbúðarbygging

Nettoíløgurnar eru mettar til kr. 24,3 mió. kr.

Talan er eitt nú um keyp av lendi og fyrireiking av íbúðarbygging, høli til nýggja læknamiðstøð, um- og útbygging av 1964-skúlanum til framhaldsdeild, ungdómstilboð, luttøka í Talgildu Føroyum og útbygging á havnalagnum, skrivar kommunan.

Ætlanin er ikki at økja um skuldina við at taka lán, men at klára rakstur og íløgur uttan lántøku.

Avdráttir av lánum næsta ár vera 4,3 mió. kr. 

Skattaprosentið og barnafrádrátturin verða óbroytt, 21,5 prosent og 7.500 kr. fyri hvørt barnið.