Ruth Vang: Framsókn er bara áhugað at tosa um nýggja samgongu

Um núverandi samgonga slitnar í næstum, er tað ósannlíkt, at Framsókn traðkar til.

"Tað kemur einans upp á tal, um løgmaður ruddar borðið fyri eini nýggjari samgongu," sigur Ruth Vang, forkvinna í Framsókn.
 

Ósemja og ruðuleiki hevur valdað í samgonguni, síðani Johan Dahl úr Sambandsflokkinum og Annika Olsen úr Fólkaflokkinum atkvøddu fyri uppskotunum um sammøður við 2. viðgerð í farnu viku.

Tá uppskotini vóru samtykt við 3. viðgerð í gjár, vóru gitingar um samgonguslit og nýval.

Aksel og Høgni vilja hava nýval

"Nýval er einasta loysnin," søgdu formenninir í Javnaðarflokkinum og Tjóðveldi í Degi og Viku í gjárkvøldið.

Teir eru ikki áhugaðir í at hjálpa sitandi samgonguflokkum.
 

Ruth Vang er ikki líka bersøgin sum hinir andstøðuformenninir.

Ringir løgmaður í morgin, so tekur hon telefonina og er sinnað at lurta.