Fleiri fólk smittað, men kortini færri deyð

Í øllum heiminum eru nógv fleiri fólk smittað við koronu seinastu vikuna enn nakrantíð áður, men kortini eru færri deyð hesa seinastu vikuna.

Tað vísa hagtøl, sum tíðindastovan AFP hevur savnað saman.

Síðstu vikuna er talið av smittaðum vaksið við 50 prosentum í øllum heiminum. Talið av fólki, ið eru deyð við korona, er hinvegin minkað við 9 prosentum.

Tilsamans 1,18 milliónir fólk eru staðfest smittað um dagin seinastu vikuna í árinum, sum er farið. Tað svarar til ein vøkstur upp á 57 prosent í mun til vikuna frammanundan, skrivar NTB.

54 prosent av teimum smittaðu eru staðfest í Evropa, og 32 prosent eru staðfest í USA og Kanada.