KvF-gjaldið prístalsjavnað og smá virki rinda minni

Sambært broytingaruppskotinum til kringvarpslógina, sum Jenis av Rana, landsstýrismaður, hevur sent út til hoyringar, skulu smærri vinnuvirki nú rinda minni í kringvarpsgjaldi.

Í løtuni er kringvarpsgjaldið hjá vinnufyritøkum ásett eftir, hvussu nógvar lønarútreiðslur fyritøkan hevur um árið. Tað verður tað framvegis, og hjá fyritøkum, sum hava meir enn tríggjar milliónir krónur um árið í lønarútgjaldi, verður kringvarpsgjaldið óbroytt.

Men lægri endin av stiganum verður broyttur, so fyritøkur, ið rinda minni enn tríggjar milliónir í lønum um árið, rinda nakað minni í kringvarpsgjaldi. 

Markið er hálvt millión

Og um samlaða lønarútgjaldið er undir 500.000 krónur, verður einki kringvarpsgjald rindað.

Í galdandi lóg skal kringvarpsgjald rindast, um samlaða lønarútgjaldið er meir enn 100.000 krónur um árið. Men hetta talið skal sambært uppskotinum broytast til 500.000 krónur.

Í uppskotinum verður eisini ásett, at kringvarpsgjaldið verður prístalsjavnað. Sagt verður í uppskotinum, at hetta er neyðugt, so stovnurin fær eitt tryggari inntøkugrundarlag. Skotið verður upp at prístalsjavna kringvarpsgjaldið við tveimum prosentum um árið.