Veðurlagsavtala: Grønland brúkar Føroyar sum fyrimynd

Grønland ætlar at brúka Føroyar sum fyrimynd, tá Grønland fer upp í veðurlagsavtaluna, sum var gjørd í París í 2015, skrivar Sermitsiaq.

Føroyska loysnin ger, at Grønland sjálvt kann velja síni veðurlagsmál og tí fær stýrt, hvussu veðurlagsavtalan rakar Grønland.

Múte B. Egede, landsstýrisformaður, segði á veðurlagsráðstevnuni COP26 í Skotlandi, at Grønland fer upp í Parísavtaluna. 

Og Grønland ætlar at brúka Føroyar sum fyrimynd.

Kunnu hava sína egnu ætlan

Føroyar kunngjørdu í 2016, at landið vildi vera við í Parísavtaluni.

Parísavtalan bindur londini til at avmarka hitaøkingina til halvtannað stig.  

Sambært Sermitsiaq binda donsku ætlanirnar um at minka CO2-útlátið ikki Føroyar. Føroyar kunnu hava sína egnu ætlan. 

Við at brúka hesa loysnina kann Grønland sjálvt avgera, hvørji stig landið tekur viðvíkjandi veðurlagsbroytingunum. 

Danmark ella ES binda ikki Grønland.