Strandferðslan skal fáa fimm milliónir í eykajáttan

Bjarni Hammer í Javnaðarflokkinum hevur skotið upp at játta Strandferðsluni fimm milliónir kr. aftrat, so tað slepst undan at hækka farmagjøldini við Smyrli.

Sambært samferðslupakkanum, sum landsstýrið hevur lagt fram, skulu farmagjøldini hækka.

Bjarni Hammer sigur í viðmerkingunum til uppskotið um eykajáttan, at hetta kann ikki góðtakast.

Samstundis sum tunnilsgjøld lækka, ella verða tikin av, verður farmagjøldini á Suðuroyarleiðini hækkað, sigur hann.

Bjarni  Hammer sigur, at Suðuroyggin er skjótt einasta av stóru økjunum í Føroyum, ið ikki er bundið saman við meginøkið.

Tí er óskiljandi, at meirilutin í tinginum leggur enn fleiri fótonglar fyri vinnulív og fólk í Suðuroynni, og forðar fyri umráðandi menningini av hesum útjaðaranum, sigur Bjarni Hammer í viðmerkingunum til uppskotið.