Landskassin fekk 141 mió. kr. í avkasti í fjør

Gjaldførið hjá landskassanum gav 141 mió. kr. í avkasti í fjør.

Tað sigur Landsbankin í ársfrágreiðingini fyri 2021.

Stórur partur av gjaldføri landskassan er settur í virðisbrøv uttanlands.

Í 2021 var avkastið 3,75 prosent, tilsamans 141 mió.kr. Serliga partabrøvini góvu nógv.

Landskassans gjaldføri hevur í miðal síðstu fimm árini givið 2,67 prosent í avkasti. Tað svarar í miðal til 90,6 mió. kr. um árið.

Ilt at meta um avkastið í ár

Trupult er at meta um gongdina hjá avkastinum í 2022, sigur Landsbankin. 

Vaksandi inflatión, væntanir um at sentralbankar fara at tátta í og hækka renturnar, fløskuhálstrupulleikar í flutningskervinum, hækkandi orkuprísir, spenta støðan millum Ukraina og Russland, umframt nógva smittan við omikron-variantinum gera óvissuna sera stóra. 

Higartil í ár hava partabrævakursirnir sveiggjað nógv, og tað sama hevur avkastið av lánsbrøvum.