Knørrur biður løgmann um hjálp at hýsa kappróðrarbátum

Róðrarfelagið Knørrur fer í dag at handa Bárði Nielsen, løgmanni, mótmælisskriv við 832 undirskriftum.

Knørrur heitir í skrivinum á løgmann um at hjálpa Knørri, nú felagið er noytt at flyta úr Evensens pakkhúsi 1. apríl.

Stokkastovan í Tinganesi, sum er 100 metrar frá hølunum hjá Knørri, skal umvælast, og tørvur er á goymsluhølum til viðarbular, sigur Løgmansskrivstovan.

Verji hjá ítrótti

- Bárður fær undirskriftirnar handaðar í leikluti sínum sum verji fyri føroyskari ítrótt, skrivar Knørrur á vanga sínum á Facebook.

Felagið hevur leitað eftir øðrum hølum við sjóvarmálan í Havn til allar kappróðrarbátarnar, men uttan úrslit.

Í løtuni er Evensens einasti møguleiki, um virksemi felagsins skal halda fram, skrivar felagið. 

Knørrur handar undirskriftirnar í Tinganesi kl. 16 í dag.