Hava tikið Kiyv aftur frá russum

Tað hevur eydnast ukrainskum herdeildum at taka Kyiv-landspartin aftur frá russum, eisini sjálvan høvuðsstaðin.

Tað upplýsir varaverjumálaráðharrin í Ukraina, Hanna Malyar.

- Allur Kyiv-landsparturin er tikin aftur frá fíggindanum, skrivar hon á Facebook.

Í gjár frættist eisini, at ukrainskar deildir hava tikið fleiri enn 30 býir og bygdir í landspartinum aftur frá russum.

Russland boðaði í farnu viku frá, at landið fór at avmarka hermegina nærindis høvuðsstaðnum og í Tjernihiv-landspartinum. Í staðin fóru russisku deildirnar at herða kríggið har eysturi í Ukraina.

Spreingingar í Odessa

Í morgun hava verið fleiri spreingingar í ukrainska havnarbýnum Odessa.

Tíðindamaðurin hjá danska kringvarpinum í Odessa, Jakob Krogh, sigur, at talan er um ógvisligar spreingingar, og stór roykskýggj síggjast yvir býnum.

Myndugleikarnir í Odessa siga, at russar hava skotið fleiri rakettir, men tað eydnaðist ukrainsku loftverjuni at skjóta nakrar rakettir niður, áðrenn tær raktu.

Lopið hevur verið á Odessa fyrr, men oyðileggingarnar hava ikki verið so stórar, sum í øðrum ukrainskum býum. 

Zelenskyj og Putin hittast

Ein limur í ukrainsku nevndini, sum hevur samráðingar við russar, sigur, at nú eru so stór framstig gjørd í samráðingunum, at tað er ikki óhugsandi, at ukrainski forsetin, Volodymyr Zelenskyj, og russiski starvsbróður hansara, Vladimir Putin, fara at hittast í næstum, skrivar ukrainska deildin hjá russisku tíðindastovuni, Interfax.

Ukrainski samráðingarmaðurin, David Arakhamia, sigur eisini, at verður toppfundur á hægsta stigi, er mest sannlíkt, at Zelenskyj og Putin hittast í Turkalandi.