Tvær skúlastovur aftrat í Skúlanum á Fløtum

Nýggi Skúlin á Fløtum er longu ov lítil.

Brúk er fyri fleiri skúlastovum.

Tórshavnar býráð skal í kvøld játta eina millión og 820.000 kr. til tvær nýggjar skúlastovur. Talan er um eykajáttan, tí pengarnir eru ikki í íløguætlanini fyri 2022. 

Sambært skránni fyri býráðsfundin í dag er ætlanin at byggja um fyrilestrasalin í útsynningshorninum móti parkeringsplássinum í Oyggj 7.

Fyrilestrasalurin er dupulthøgt rúm. 

Krevur dagført byggiloyvi

Ætlanin er taka niður verandi uppbygging, leggja nýtt dekk í, umleggja tekniskar leiðingar og síðani byggja um til tvær  skúlastovur.

Nýggju stovurnar verða bygdar í sama sniði og dygd sum verandi stovur í skúlanum. Útveggirnir vera óbroyttir.

Broytingin krevur dagført byggiloyvi.

Articon og Búsetur, sum bygdu skúlan á Fløtum, eru biðin um óbindandi tilboð.

Býráðið skal eisini í dag geva umsitingini loyvi til at fara í endaligar samráðingar og gera arbeiðstøkusáttmála við Articon og Búsetur.